Top 10 News Update | १. राज-उद्धव एकत्र येणार? महाराष्ट्रात खळबळ : राज ठाकरे आणि उद्धव ठाकरे यांच्या संभाव्य युतीच्या चर्चेने महाराष्ट्रातील राजकारण ढवळून निघालं आहे. देवेंद्र फडणवीस, सुप्रिया सुळे, छगन भुजबळ, राघव चड्ढा यांसारख्या अनेक नेत्यांनी यावर प्रतिक्रिया दिल्या. स्वतः राज ठाकरे म्हणाले, “मोठ्या उद्दिष्टासाठी भूतकाळ विसरायला हरकत नाही.” तर मुख्यमंत्री शिंदे यांनी हे सर्व खोडसाळ राजकारण असल्याचं म्हटलं.
२. अहमदनगर जिल्ह्यात विखे पाटलांचा पोलिसांना आदेश – ‘काळ्या काचा, फॅन्सी नंबर प्लेट्सवर कारवाई करा’
पालकमंत्री राधाकृष्ण विखे पाटील यांनी जिल्ह्यातील पोलीस अधिकाऱ्यांना थेट आदेश दिले की, कोणत्याही वाहनावर काळ्या काचा, फॅन्सी नंबर किंवा आमदारांचे स्टिकर्स असतील, तर सरळ कारवाई करा. ‘कायदा सर्वांसाठी समान आहे’ अशी स्पष्ट भूमिका त्यांनी घेतली.
३. भाजप आमदार तुषार राठोड यांची मुख्यमंत्र्यांकडे तक्रार – पक्षातच दुजाभावाचा आरोप
छत्रपती संभाजीनगरमधील भाजप आमदार तुषार राठोड यांनी मुख्यमंत्री एकनाथ शिंदे यांच्याकडे तक्रार करत सांगितलं की, तांडा-वस्ती निधीच्या वाटपात त्यांना डावललं जातंय. हे वक्तव्य पक्षातील अंतर्गत नाराजीचं संकेत देत आहे.
४. पुण्यातील तनिषा भिसे मृत्यू प्रकरणात डॉक्टर दोषी ठरले, गुन्हा दाखल
पुण्यातील गर्भवती महिला तनिषा भिसे यांच्या मृत्यू प्रकरणात डॉक्टर सुश्रुत घैसास यांच्यावर गुन्हा दाखल करण्यात आला आहे. दुसऱ्या अहवालात डॉक्टरांच्या दुर्लक्षित उपचारामुळे मृत्यू झाल्याचं स्पष्ट झालं आहे.
५. मुंबईत विलेपार्लेतील जैन मंदिर पाडल्याप्रकरणी बीएमसी अधिकाऱ्याची बदली
विलेपार्लेतील ऐतिहासिक जैन मंदिर पाडल्याप्रकरणी वॉर्ड ऑफिसर नवनाथ घाडगे यांची तात्काळ बदली करण्यात आली आहे. पालिका आयुक्त भूषण गगराणी यांच्या आदेशावरून ही कारवाई करण्यात आली.
६. सिंधुदुर्गात मनसेचा आंदोलनाचा इशारा – रोडमार्किंग रात्री सुरू ठेवू नका
शक्तिपीठ महामार्गावर रात्रीच्या वेळी सुरू असलेल्या रोड मार्किंग कामावर मनसेने आक्षेप घेतला असून ॲड. अनिल केसरकर यांनी मनसे स्टाईलने आंदोलनाचा इशारा दिला आहे.
७. बडतर्फ पोलीस अधिकारी रणजीत कसलेवर पुन्हा गुन्हा, १० लाख उधार घेतल्याचा आरोप
बडतर्फ पोलीस अधिकारी रणजीत कसले यांच्यावर ठेकेदार सुदर्शन काळे यांनी निवडणूक खर्चासाठी १० लाख रुपये उधार घेतल्याचा आरोप केला असून पोलिसांनी त्यांच्याविरोधात गुन्हा दाखल केला आहे.
८. सोलापूरात शिवसेना कार्यक्रमात गोंधळ – दोन गटांत ढकलाढकली
मंत्री भरत गोगावले यांच्या उपस्थितीत झालेल्या शिवसेना कार्यक्रमात दोन स्थानिक नेत्यांमध्ये वाद झाला. त्यातून शिवीगाळ, ढकलाढकली झाली आणि वातावरण चिघळलं.
९. संग्राम थोपटे भाजपात जाणार? – काँग्रेसमध्ये खळबळ
बारामतीचे माजी आमदार संग्राम थोपटे हे भाजपमध्ये जाण्याच्या चर्चा जोरात आहेत. काँग्रेस प्रदेशाध्यक्ष हर्षवर्धन सपकाळ यांनी थोपटे यांना आत्मघातकी निर्णय घेऊ नये, अशी विनंती केली आहे.
१०. ‘संजय राऊत कोण?’ – फडणवीसांचा उपरोधिक टोला
संजय राऊत यांनी राज्यातील पाणीटंचाईवरून सरकारवर टीका केली होती. त्याला प्रत्युत्तर देताना देवेंद्र फडणवीस यांनी “संजय राऊत कोण?” असा उपरोधिक सवाल करत त्यांचं महत्त्वच कमी करण्याचा प्रयत्न केला.