Top 10 News Maharashtra | 1. ठाकरे गटाचा इशारा : लाखो शेतकऱ्यांसह ट्रॅक्टर मोर्चा घेऊन विधिमंडळाला वेढा
ठाकरे गटाचे आमदार नितीन देशमुख यांनी आज सरकारला गंभीर इशारा दिला. त्यांनी म्हटलं की, जर हिवाळी अधिवेशनापूर्वी शेतकऱ्यांचा सातबारा कोरा केला नाही, तर नागपूर अधिवेशनाच्या काळात लाखो शेतकऱ्यांना घेऊन ट्रॅक्टर मोर्चा काढून विधिमंडळाला वेढा घालण्यात येईल. सरकारने वेळेवर शेतकऱ्यांच्या प्रश्नांकडे लक्ष न दिल्यास तीव्र आंदोलन छेडण्याचा निर्धार त्यांनी व्यक्त केला.
2. पहलगाम हल्ल्यावर फारूख अब्दुल्ला यांचे धक्कादायक विधान
जम्मू-काश्मीरमधील पहलगाम येथे झालेल्या दहशतवादी हल्ल्याच्या पार्श्वभूमीवर फारूख अब्दुल्ला यांनी मोठं विधान केलं. त्यांनी म्हटलं, “इतका मोठा हल्ला स्थानिक पाठिंब्याशिवाय होऊ शकत नाही.” यावरून दहशतवाद्यांना स्थानिकांची मदत असल्याचा गंभीर आरोप त्यांनी केला आहे.
3. लाडकी बहिन योजना : 2-3 दिवसांत सर्व पात्र महिलांना मिळणार एप्रिलचे पैसे
लाडकी बहिन योजनेच्या एप्रिल हप्त्याचे पैसे पात्र लाभार्थी महिलांच्या खात्यावर जमा होण्यास सुरुवात झाली आहे. मंत्री आदिती तटकरे यांनी ट्विट करत ही माहिती दिली असून पुढील दोन ते तीन दिवसांत उर्वरित महिलांना रक्कम मिळणार असल्याचं त्यांनी स्पष्ट केलं.
4. भारत-पाकिस्तान तणाव : भारतीय पासपोर्टधारकांना पाकिस्तानने एंट्री नाकारली
पहलगाम हल्ल्यानंतर भारत-पाकिस्तान संबंध तणावपूर्ण झाले आहेत. अटारी बॉर्डरवर भारतीय पासपोर्टधारक नागरिकांना पाकिस्तानमध्ये प्रवेश नाकारण्यात आला आहे. पाकिस्तानच्या या भूमिकेमुळे दोन्ही देशांत संघर्षाची शक्यता वाढली आहे.
5. बच्चू कडूंचं आंदोलन : फडणवीसांच्या घरासमोर आंदोलनाची घोषणा
कर्जमाफीच्या मुद्द्यावर अपक्ष आमदार बच्चू कडू यांनी आता मुख्यमंत्री देवेंद्र फडणवीस यांच्या नागपूर येथील घरासमोर आंदोलन करणार असल्याचे जाहीर केले आहे. याआधी त्यांनी अजित पवार व अन्य नेत्यांच्या घरासमोर आंदोलन केलं होतं.
6. बुलढाण्यात ठाकरे गटाचा ट्रॅक्टर मोर्चा, शेकडो शेतकऱ्यांचा सहभाग
शिवसेना (उद्धव बाळासाहेब ठाकरे) पक्षातर्फे बुलढाण्यात जिल्हाधिकारी कार्यालयावर विशाल ट्रॅक्टर मोर्चा काढण्यात आला. कर्जमाफी, सातबारा कोरा व इतर शेतकरी प्रश्नांवर केंद्रित हा मोर्चा शेकडो शेतकऱ्यांच्या सहभागामुळे ठळक ठरला.
7. पहलगाम हल्ल्यानंतर सायबर हल्ल्यांची स्फोटक संख्या; महाराष्ट्र सायबर अलर्ट
पहलगाम हल्ल्यानंतर महाराष्ट्र सायबर विभागाने तब्बल १० लाख सायबर हल्ल्यांची नोंद घेतली आहे. हे बहुतेक हल्ले पाकिस्तानकडून झाले असून, बँकिंग व सरकारी पोर्टल्सवर त्याचा प्रभाव पडला आहे.
8. पंकजा मुंडे यांना अश्लील मेसेज; आरोपी पुण्यातून अटकेत
पर्यावरण मंत्री पंकजा मुंडे यांना अश्लील मेसेज पाठवणाऱ्या परळी तालुक्यातील अमोल काळे या तरुणाला पुण्यातून अटक करण्यात आली आहे. सायबर पोलिसांनी त्याचा मोबाईल जप्त करत पुढील चौकशी सुरू केली आहे.
9. गोदावरी खोऱ्यासाठी ८३ टीएमसी पाणी आणणार – सी. आर. पाटील
केंद्रीय जलशक्ती मंत्री सी. आर. पाटील यांनी सांगितले की, चार नदीजोड प्रकल्पांच्या माध्यमातून गोदावरी खोऱ्यात ८३ टीएमसी पाणी आणण्यात येणार आहे. यामुळे हे क्षेत्र दुष्काळमुक्त होईल, असा विश्वास त्यांनी व्यक्त केला.
10. मराठी चित्रपटसृष्टीला उद्योगाचा दर्जा – उदय सामंत
उद्योग मंत्री उदय सामंत यांनी जाहीर केलं की, १ मे पासून महाराष्ट्रातील मराठी चित्रपटसृष्टीला औद्योगिक दर्जा देण्यात आला आहे. यामुळे या क्षेत्रातील आर्थिक गुंतवणूक, रोजगार आणि सुविधा वाढण्यास मदत होणार आहे.