Supriya Sule | 1. पुरंदर विमानतळाला विरोध करणाऱ्या शेतकऱ्यांवर लाठीमार – सुप्रिया सुळेंचा निषेध
बारामती लोकसभा मतदारसंघातील पुरंदर तालुक्यातील कुंभारवळण येथे विमानतळाच्या विरोधात आंदोलन करणाऱ्या शेतकऱ्यांवर पोलिसांनी लाठीमार केला. या घटनेत अनेक शेतकरी जखमी झाले. या प्रकारावर खासदार सुप्रिया सुळे यांनी तीव्र नाराजी व्यक्त करत सरकारवर निशाणा साधला. “नागरिकांच्या भावना लक्षात न घेता बळाचा वापर दुर्दैवी व वेदनादायक आहे,” असे सुळे म्हणाल्या. त्यांनी या विषयावर संयम आणि संवेदनशीलतेने कारवाई करण्याचे आवाहन केले.
2. आदिवासी निधी वळवला; दानवेंचा सरकारवर घणाघात
ठाकरे गटाचे आमदार अंबादास दानवे यांनी सरकारवर आरोप केला की, ‘लाडकी बहिण योजना’ चालवण्यासाठी आदिवासी विकास खात्याच्या 746 कोटी रुपयांचा निधी वळवण्यात आला आहे. त्यांनी असा आरोप केला की, सरकार आदिवासी आणि दुर्बल घटकांवरील योजनांचा पैसा राजकीय उपयोगासाठी वापरत आहे.
3. अजित पवार मुख्यमंत्री होतील, हे माझंही स्वप्न – सुनिल तटकरे यांचे विधान
उपमुख्यमंत्री अजित पवार यांनी मुख्यमंत्री होण्याची इच्छा व्यक्त केली होती. त्यावर प्रतिक्रिया देताना खासदार सुनिल तटकरे म्हणाले की, “अजित पवार यांनी आतापर्यंत सर्वाधिक वेळा उपमुख्यमंत्रिपदाची शपथ घेतली आहे. मात्र आता त्यांना मुख्यमंत्री म्हणून शपथ घ्यावी हे माझंही स्वप्न आहे.”
4. जयंत पाटील यांचा अजित पवारांवर टोला
अजित पवारांच्या मुख्यमंत्री होण्याच्या इच्छेवर राष्ट्रवादी काँग्रेस (शरद पवार गट) चे आमदार जयंत पाटील म्हणाले, “त्यांना शुभेच्छा, पण पाच वर्षांत मुख्यमंत्री होणं शक्य नाही.” हा स्पष्टपणे टोला मानला जात आहे.
5. शक्तिपीठ महामार्गाला बांद्यात एकमुखी विरोध
नागपूर-गोवा शक्तिपीठ महामार्गाच्या प्रस्तावाला सिंधुदुर्ग जिल्ह्यातील बांदा येथे ग्रामसभेत एकमुखी विरोध करण्यात आला. यासाठी ग्रामपंचायतीने ठरावही मंजूर केला असून महामार्गविरोधी कृती समिती स्थापन करण्यात आली आहे.
6. बारामतीत जाऊन अर्थसंकल्प वाचणार – बच्चू कडूंचा इशारा
माजी आमदार बच्चू कडू यांनी अजित पवारांच्या बारामतीत जाऊन अर्थसंकल्प वाचून दाखवण्याचा इशारा दिला आहे. शेतकरी, दिव्यांग व मजुरांसाठी कोणतीही ठोस तरतूद नसल्याचा आरोप त्यांनी केला.
7. गुलाबराव पाटलांचा पक्षांतर करणाऱ्यांवर सणसणीत हल्ला
पाणीपुरवठा मंत्री गुलाबराव पाटील यांनी पक्षात येणाऱ्या काही नेत्यांवर निशाणा साधला. “ते पक्ष वाढवण्यासाठी नव्हे, तर स्वतःची घाण झाकण्यासाठी येतात,” असा आरोप त्यांनी केला. त्यांनी कोणाचे नाव घेतले नाही, मात्र संदेश स्पष्ट होता.
8. लईराई देवीच्या जत्रेत चेंगराचेंगरी; 6 मृत, 70 जखमी
गोव्यातील शिरगाव येथील प्रसिद्ध लईराई देवीच्या जत्रेत झालेल्या चेंगराचेंगरीत सहा जणांचा मृत्यू झाला असून 70 हून अधिक भाविक जखमी झाले आहेत. जत्रेच्या गर्दीत अचानक गोंधळ झाल्याने ही घटना घडली. जखमींवर विविध रुग्णालयात उपचार सुरू आहेत.
9. NEET 2024 पेपरफुटी प्रकरणात 250 विद्यार्थ्यांवर कारवाई
NEET 2024 परीक्षेतील पेपरफुटी प्रकरणात मोठी कारवाई करण्यात आली असून सुमारे 250 विद्यार्थ्यांवर कारवाई करण्यात आल्याची माहिती नॅशनल टेस्टिंग एजन्सीने दिली आहे. या प्रकरणामुळे परीक्षेची पारदर्शकता आणि विद्यार्थ्यांचा विश्वास धोक्यात आला आहे.
10. भारताची पाकिस्तानवर आर्थिक नाकेबंदी – संपूर्ण व्यापार बंद
पहलगाम येथे झालेल्या दहशतवादी हल्ल्यानंतर भारताने पाकिस्तानविरोधात आणखी एक कठोर पाऊल उचलले आहे. भारताने पाकिस्तानसोबतचा सर्व आयात-निर्यात व्यापार तत्काळ थांबवला असून पाकिस्तानी जहाजांना भारतीय बंदरांवर प्रवेश बंदी घालण्यात आली आहे.