Nagpur Municipal Corporation Election │ नागपूर महानगरपालिका निवडणुकीच्या पार्श्वभूमीवर ठाकरे गटाने आपली निवडणूक रणनिती अधिक आक्रमक केली आहे. एकीकडे महाविकास आघाडीचा भाग म्हणून काँग्रेस आणि राष्ट्रवादी काँग्रेससोबत समन्वय साधण्याचे प्रयत्न सुरू असताना, दुसरीकडे कार्यकर्त्यांना स्पष्ट आदेश देण्यात आले आहेत की, कोणत्याही परिस्थितीत गाफील न राहता स्वबळावर निवडणुकीची तयारी सुरू करा.
महाविकास आघाडीमध्ये समन्वयातून जागावाटप होईल, अशी शक्यता आहे. परंतु, जर आघाडीमध्ये ठाकरे गटाला बरोबरीचे स्थान मिळाले नाही, तर पक्ष स्वतंत्र लढत देण्यास मागे हटणार नाही, असे ठाम मत आता सार्वजनिकपणे मांडले गेले आहे. ही भूमिका महत्त्वाची मानली जात असून, नागपूरमध्ये महापालिकेच्या सत्तेसाठी होणाऱ्या लढतीला त्यामुळे नवे वळण मिळू शकते.
या संदर्भात बुधवारी नागपूरच्या रविभवन येथे ठाकरे गटाच्या वरिष्ठ नेत्यांची बैठक पार पडली. या बैठकीत संघटक सागर डबरासे यांच्या अध्यक्षतेखाली प्रमुख पदाधिकाऱ्यांनी पुढील रणनितीवर चर्चा केली. यामध्ये जिल्हाप्रमुख प्रमोद मानमोडे, शहरप्रमुख नितीन तिवारी, युवासेना जिल्हाप्रमुख प्रीतम कापसे, वाहतूक सेनेचे प्रमुख राजेश वाघमारे आणि उपजिल्हाप्रमुख मनोज शाहू आदी नेते उपस्थित होते.
या बैठकीत नागपूर महानगरपालिका अंतर्गत येणाऱ्या सर्वच विधानसभा क्षेत्रांची संघटनात्मक पाहणी करण्यात आली. यानंतर महापालिका निवडणुकीतील तयारीवर चर्चा झाली. यावेळी ‘एक शहर, एक नेता’ हे धोरण पुन्हा अधोरेखित करण्यात आले. प्रत्येक विधानसभा क्षेत्रात पक्षाचा एकच जबाबदार नेता राहील आणि त्याच्याकडे जागावाटप, तिकीट वाटप आणि पक्षाचे स्थानिक आंदोलन याची जबाबदारी असेल. संपर्क प्रमुखांनी सहसंपर्क प्रमुख आणि राज्य संघटकांबरोबर समन्वय साधत हे काम करावे, असे स्पष्ट निर्देश देण्यात आले.
निवडणूक अजून जाहीर झालेली नसली, तरी पक्षाने आंदोलनात्मक कार्यक्रम, प्रचार विषय आणि प्रमुख विरोधकांवर प्रहार करण्याच्या रणनीतीवरही विचार केला आहे. कोणत्या सामाजिक, नागरी आणि स्थानिक मुद्द्यांवर शहरात आंदोलन उभारायचे, कोणत्या ठिकाणी मोर्चे काढायचे यावर बैठकीत चर्चा झाली. ठाकरे गट स्थानिक स्वराज्य संस्थेतील निवडणुकीत मुद्द्यांवर आधारित प्रचारावर भर देणार असल्याचे संकेत मिळाले आहेत.
महाविकास आघाडीबाबत बोलताना नेत्यांनी स्पष्ट केले की, ठाकरे गट हा आघाडीचा घटक पक्ष आहे आणि उद्धव ठाकरे यांच्या नेतृत्त्वातच राज्यात महाविकास आघाडीने सत्ता सांभाळली होती. तेव्हा त्यांच्या पक्षाला महापालिकेत बरोबरीचे स्थान मिळाले पाहिजे, ही भूमिका बैठकीत ठामपणे मांडण्यात आली. विशेषतः काँग्रेस किती जागा सोडणार, याबाबत अजूनही स्पष्टता नाही, त्यामुळे पक्षाने सध्यातरी स्वबळावर तयारी सुरू ठेवण्याचे धोरण स्वीकारले आहे.
ही भूमिका कार्यकर्त्यांमध्ये जोश निर्माण करणारी ठरत असून, अनेक प्रभागांमध्ये स्थानिक पातळीवर प्रचार सुरू करण्यात आला आहे. आगामी निवडणूक ही शिवसेना (उद्धव बाळासाहेब ठाकरे) गटासाठी प्रतिष्ठेची ठरणार असून, भाजपप्रणीत सत्ताधारी यंत्रणेला जोरदार टक्कर देण्याचा निर्धार पक्षाने घेतला आहे.
या पार्श्वभूमीवर नागपूर महापालिकेची निवडणूक केवळ विकासकामांवर मर्यादित राहणार नसून, ती महाविकास आघाडीतील घटक पक्षांतील समीकरणे, स्वाभिमान आणि जनाधार यांच्याही कसोटीची ठरणार आहे. ठाकरे गटाच्या निर्णयामुळे आगामी काही दिवसांत नागपूरची राजकीय समीकरणे अधिकच गती घेतील, हे निश्चित.