Gokul Election | महानगरपालिका निवडणुकीनंतर आता जिल्हा परिषद निवडणुकीची रणधुमाळी सुरू असतानाच, कोल्हापूरच्या राजकारणाचे लक्ष पुढील मोठ्या लढतीकडे वेधले गेले आहे. ती लढत म्हणजे सहकार क्षेत्रातील सर्वात मोठी आणि प्रतिष्ठेची मानली जाणारी गोकुळ दूध संघाची निवडणूक. जिल्हा परिषद निवडणुकीचा धुरळा खाली बसताच गोकुळ आणि जिल्हा मध्यवर्ती सहकारी बँकेच्या निवडणुका जाहीर होण्याची शक्यता असून, त्यामुळे जिल्ह्यातील राजकीय वातावरण अधिक तापण्याची चिन्हे आहेत.
सध्या ७ फेब्रुवारी रोजी जिल्हा परिषद निवडणुकीसाठी मतदान होणार असून ९ फेब्रुवारीला मतमोजणी पार पडणार आहे. या निवडणुकीत सर्वच प्रमुख राजकीय नेत्यांची प्रतिष्ठा पणाला लागली आहे. भाजप, काँग्रेस, राष्ट्रवादी काँग्रेस (शरद पवार गट व अजित पवार गट), शिवसेना (शिंदे गट व ठाकरे गट) यांच्यासह स्थानिक आघाड्यांनी वेगवेगळ्या तालुक्यांत अनपेक्षित आणि ‘विचित्र’ आघाड्या केल्या आहेत. या आघाड्यांमागे एकच उद्दिष्ट असल्याचे बोलले जात आहे. गोकुळ आणि जिल्हा बँकेवर वर्चस्व मिळवणे.
गोकुळ ( Gokul Election ) दूध संघ ही केवळ दुग्ध उत्पादकांची संस्था नसून, ती कोल्हापूर जिल्ह्यातील सहकार राजकारणाची शक्ती मानली जाते. हजारो दूध उत्पादक सभासद, कोट्यवधींची उलाढाल, गावागावात पोहोचलेले नेटवर्क आणि ग्रामीण मतदारांवर असलेला प्रभाव यामुळे गोकुळवर सत्ता मिळवणे म्हणजे जिल्ह्याच्या राजकारणात वरचष्मा मिळवणे असे समीकरण आहे. त्यामुळेच गोकुळची निवडणूक ही प्रत्यक्षात राजकीय शक्तीची चाचणी मानली जाते.
जिल्हा परिषद निवडणूक संपल्यानंतर कोणत्याही क्षणी गोकुळच्या निवडणुकीचे बिगुल वाजण्याची शक्यता आहे. प्रशासकीय पातळीवर तशी तयारी सुरू असल्याची माहिती आहे. पुढील महिन्यात दुग्ध निबंधक कार्यालयाकडून गोकुळला मतदार यादी तयार करण्याबाबतचे पत्र येण्याची शक्यता वर्तवली जात आहे. साधारण मार्च महिन्यापासून मतदार याद्या अंतिम करण्याच्या सूचना दिल्या जातील आणि त्यानंतर मे महिन्याच्या अखेरीस प्रत्यक्ष निवडणूक प्रक्रिया पार पडण्याची दाट शक्यता आहे.
जिल्हा परिषद निवडणुकीचे निकाल हे गोकुळ निवडणुकीसाठी दिशा ठरवणारे ठरणार आहेत. कोणत्या तालुक्यात कोणता गट वरचढ ठरतो, कुणाला किती सभासदांचा पाठिंबा मिळतो, यावर पुढील रणनीती आखल्या जातील. त्यामुळे अनेक नेते जिल्हा परिषद निवडणूक हीच गोकुळची ‘सेमीफायनल’ असल्याचे खासगीत सांगत आहेत. जिल्हा परिषदेत मिळालेल्या यशाच्या जोरावर गोकुळसाठी आघाड्या मजबूत करण्याचा प्रयत्न केला जाणार आहे.
गोकुळ निवडणुकीच्या पार्श्वभूमीवर सर्वच पक्षांत अंतर्गत हालचालींना वेग आला आहे. काही ठिकाणी जुन्या वैरांना बाजूला ठेवत हातमिळवणी होत आहे, तर काही ठिकाणी पक्षांतर्गत गटबाजी उफाळून येताना दिसत आहे. “गोकुळसाठी कुणालाही सोबत घेण्याची तयारी” अशी मानसिकता अनेक नेत्यांची असल्याचे चित्र आहे. त्यामुळे आगामी काळात आणखी अनपेक्षित राजकीय घडामोडी पाहायला मिळण्याची शक्यता आहे.
गोकुळची निवडणूक थेट ग्रामीण भागाशी जोडलेली असल्याने तिचा परिणाम गावपातळीवरील राजकारणावरही होणार आहे. दूध उत्पादक सभासद, सोसायटीचे संचालक, स्थानिक नेते यांची मते निर्णायक ठरणार आहेत. त्यामुळे प्रत्येक गटाकडून गावोगावी बैठका, संपर्क मोहिमा, सामाजिक कार्यक्रमांमधून उपस्थिती वाढवण्यावर भर दिला जात आहे. जिल्ह्यातील राजकीय वातावरण हळूहळू निवडणूकमय होत चालले आहे.
एकंदरीत, जिल्हा परिषद निवडणूक संपल्यानंतर कोल्हापूर जिल्ह्यातील राजकारण थांबणार नसून, उलट ते नव्या वळणावर जाणार आहे. गोकुळ दूध संघाची निवडणूक ही सहकार क्षेत्रातील सर्वात मोठी लढत ठरणार असून, तिचा निकाल जिल्ह्याच्या राजकीय समीकरणांवर दीर्घकालीन परिणाम करणारा असेल. त्यामुळे येत्या काही महिन्यांत कोल्हापूरच्या राजकारणात आरोप-प्रत्यारोप, आघाड्या-फाटाफूट आणि सत्तासंघर्ष अधिक तीव्र होताना पाहायला मिळणार आहे.