Eknath Shinde Dino Morea | राज्यातील पावसाळी अधिवेशनाच्या पूर्वसंध्येला राजकीय वातावरण तापले असून, मुंबईतील मिठी नदी गाळ काढण्याच्या कामातील कथित घोटाळा पुन्हा एकदा केंद्रस्थानी आला आहे. विशेष म्हणजे, या घोटाळ्याचा उल्लेख करताना राज्याचे उपमुख्यमंत्री एकनाथ शिंदे यांनी थेट अभिनेता डिनो मोरिया याचे नाव जाहीरपणे घेतले, आणि तेही मुख्यमंत्री देवेंद्र फडणवीस आणि उपमुख्यमंत्री अजित पवार यांच्या उपस्थितीत. यामुळे शिवसेना (उद्धव बाळासाहेब ठाकरे) गटावर अप्रत्यक्ष निशाणा साधल्याचे राजकीय वर्तुळात बोलले जात आहे.
पावसाळी अधिवेशनाच्या पार्श्वभूमीवर सत्ताधारी महायुतीने नेहमीप्रमाणे पत्रकार परिषद घेतली. मुख्यमंत्री देवेंद्र फडणवीस, उपमुख्यमंत्री अजित पवार आणि उपमुख्यमंत्री एकनाथ शिंदे यांची संयुक्त पत्रकार परिषद पार पडली. या पत्रकार परिषदेमध्ये सरकारकडून विविध मुद्द्यांवर स्पष्टीकरण देण्यात आलं. याचवेळी शिंदे यांनी मिठी नदी प्रकरणाचा उल्लेख करत “या प्रकरणी चौकशी सुरू असून, यात ‘डिनो मोरियाच्या कंपनीला’ जबाबदार धरण्यात येत आहे,” असे वक्तव्य केले.
डिनो मोरियाच्या कंपनीला मुंबईतील मिठी नदीमधील गाळ काढण्याचं काम देण्यात आलं होतं. हे काम सार्वजनिक हिताचं आणि अतिशय महत्त्वाचं असतानाही, या प्रक्रियेमध्ये गंभीर अनियमितता झाल्याचा आरोप आहे. आर्थिक गुन्हे शाखा (EOW) या प्रकरणाची चौकशी करत आहे. इतकंच नाही तर डिनो मोरियाच्या घरी अंमलबजावणी संचालनालयाने (ED) छापाही टाकला असून, दोन वेळा समन्स बजावले आहेत.
या प्रकरणात महत्त्वाची बाब म्हणजे, अभिनेता डिनो मोरिया शिवसेना (उद्धव बाळासाहेब ठाकरे) गटाचे आमदार आणि माजी मंत्री आदित्य ठाकरे यांचा निकटवर्तीय मानला जातो. त्यामुळेच शिंदेंच्या या वक्तव्याचा राजकीय संकेत म्हणूनही अर्थ काढला जात आहे. गेल्या काही महिन्यांपासून ठाकरे गट आणि शिंदे गटामध्ये आरोप-प्रत्यारोप सुरू आहेत. शिंदेंनी याआधी अनेकदा “मिठी नदीत भ्रष्टाचार झाला” असं म्हटलं होतं, पण डिनो मोरियाचं नाव प्रथमच थेट आणि जाहीरपणे घेतल्याने, या प्रकरणाने नव्याने राजकीय उकळ्या घेतल्या आहेत.
दरम्यान, अधिवेशनापूर्वी नेहमीप्रमाणे सत्ताधारी पक्षांनी चहापान कार्यक्रम आयोजित केला होता. मात्र, विरोधकांनी या कार्यक्रमावर बहिष्कार टाकला. त्यामुळे सत्ताधारी आणि विरोधकांमधील तणाव अधिवेशनात अधिक तीव्र होण्याची शक्यता आहे.
सध्या राज्यात पावसाळा सुरू असून, मुंबईतील पूरस्थिती, गटार व्यवस्था, आणि नद्यांची सफाई यावर जनतेचे लक्ष केंद्रित आहे. अशा वेळी मिठी नदीतील गाळ काढण्याच्या कामात घोटाळ्याचे आरोप आणि त्यात ठाकरे गटाशी संबंधित नाव समोर येणे, ही बाब महत्त्वाची आहे. त्यामुळे या प्रकरणाचा सत्ताधारी अधिवेशनात जोरदार राजकीय वापर करतील, अशी शक्यता आहे.
राजकीय विश्लेषकांच्या मते, शिंदेंनी डिनो मोरियाचं नाव अत्यंत वेळ साधून घेतलं. कारण अधिवेशनाच्या पूर्वसंध्येला सत्ताधारींची संयुक्त पत्रकार परिषद, विरोधकांच्या बहिष्काराची पार्श्वभूमी आणि मुंबईतील नागरिकांमध्ये वाढती नाराजी — या सर्व गोष्टींच्या केंद्रस्थानी मिठी नदीचा प्रश्न आहे. त्यामुळे या घोटाळ्याच्या मुद्द्याला पुन्हा एकदा उजाळा देऊन शिंदे यांनी सामान्य जनतेच्या भावनांना हात घालण्याचा आणि विरोधकांवर दबाव टाकण्याचा प्रयत्न केला आहे.