Devendra Fadnavis On Uddhav Thackeray | मुंबई ( 1 जुलै 2025 ) भाजपचे नेते आणि उपमुख्यमंत्री देवेंद्र फडणवीस यांनी पुन्हा एकदा शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्यावर जोरदार टीका केली आहे. भाजपचे नवे प्रदेशाध्यक्ष म्हणून रविंद्र चव्हाण यांच्या नियुक्तीनंतर आयोजित कार्यक्रमात फडणवीस यांनी आपल्या खास शैलीत उद्धव ठाकरेंच्या टीकेला प्रत्युत्तर दिले.
राज्यातील त्रिभाषा धोरणावरून सुरू झालेला वाद आता राजकीय आरोप-प्रत्यारोपाच्या उंचीवर पोहोचला आहे. याच पार्श्वभूमीवर बोलताना फडणवीस म्हणाले, “फेक नरेटिव्ह तयार करणाऱ्यांची फॅक्टरी ही उद्धव ठाकरेंचीच आहे. लोकसभा निवडणुकीत त्यांनी फेक नरेटिव्हच्या जोरावर यश मिळवलं. विधानसभेतही तसंच करण्याचा प्रयत्न केला. पण आम्ही त्यांचा हा डाव हाणून पाडला.”
राज्यातील आगामी स्थानिक स्वराज्य संस्थांच्या निवडणुकांपूर्वी ठाकरे गट महाराष्ट्र आणि मुंबई यांच्यात फूट पाडण्याचा खोटा प्रचार करत असल्याचा आरोपही फडणवीसांनी केला. “महाराष्ट्रापासून मुंबई तोडली जातेय, असा खोटा प्रचार रेटून ठाकरे गट जनतेची दिशाभूल करत आहे. पण ही शक्यता केवळ अशक्यच नव्हे, तर कुणाच्या बापामध्येही ती हिंमत नाही,” अशा शब्दांत त्यांनी उद्धव ठाकरेंवर नाव न घेता घणाघात केला.
राज्य शासनाने नुकतेच त्रिभाषा सूत्रातील हिंदी सक्तीचा निर्णय रद्द केला होता. त्यानंतर उद्धव ठाकरे यांनी फडणवीस सरकारवर “हिंदीसक्ती” आणण्याचा आरोप करत भाजपवर टीकास्त्र सोडलं. याला उत्तर देताना फडणवीस म्हणाले, “हा निर्णय आम्ही घेतलेला नाही. हा निर्णय ठाकरेंच्याच सरकारचा आहे. तेव्हा त्यांनी स्वतः समिती नेमून हिंदी शिक्षण अनिवार्य करण्याचा अहवाल तयार केला आणि तो मंत्रिमंडळाने मंजूर केला. त्यावर स्वतः उद्धव ठाकरे यांची सही आहे.”
फडणवीस पुढे म्हणाले, “आज ठाकरे स्वतःच्या निर्णयाला विरोध करत आहेत. यावरून त्यांच्या भूमिकेतील विरोधाभास स्पष्ट होतो. आपल्याच निर्णयाला विरोध करून, स्वतःच जिंकल्याचा दावा करणं हास्यास्पद आहे.”
मुंबई महानगरपालिकेच्या संदर्भातही फडणवीसांनी ठाकरे गटावर टीकेचा बाण सोडला. ते म्हणाले, “मुंबईचा चेहरा आमच्या सरकारनंतर बदलला. पण शिवसेनेने मुंबई महापालिकेला सोन्याचं अंडं देणारी कोंबडी समजून ती अंडी खाण्याचं काम केलं. शेवटी त्या कोंबडीचं गळंच कापलं.” ही टीका उद्धव ठाकरे यांच्या नेतृत्वाखालील मुंबई महापालिकेच्या कारभारावर होती.
भाजपवर हिंदी लादण्याचा आरोप होत असतानाच फडणवीस यांनी स्पष्ट केले की, “मराठी भाषा हीच आमची प्राथमिकता आहे. मात्र आम्हाला भारतातील प्रत्येक भाषेचा अभिमान आहे. आम्ही इंग्रजीला पायघड्या घालून भारतीय भाषांचा अपमान करणारे नाही. बॉम्बे स्कॉटिशमध्ये शिकणारे, इंग्रजीला मान देणारे आणि हिंदीला विरोध करणारे आम्ही नाही.”
फडणवीस यांनी असेही सांगितले की, “भाजप सरकार कोणत्याही भाषावादी दबावाला बळी पडणार नाही. मराठी विद्यार्थ्यांच्या हिताचा निर्णय घेणं हीच आमची प्राथमिकता आहे.”
रविंद्र चव्हाण यांची भाजपचे महाराष्ट्र प्रदेशाध्यक्ष म्हणून निवड झाल्यानंतर आयोजित करण्यात आलेल्या कार्यक्रमात हे सगळे घडले. यावेळी केंद्रीय मंत्री किरेन रिजिजू यांनी अधिकृत घोषणा केली. फडणवीसांच्या या टीकांमुळे भाजप-शिवसेना (ठाकरे गट) यांच्यातील संघर्ष अधिक उफाळण्याची शक्यता आहे.
उद्धव ठाकरे यांची प्रतिक्रिया अद्याप समोर आलेली नाही. मात्र या टीकेनंतर राजकीय वर्तुळात खळबळ निर्माण झाली आहे आणि आगामी निवडणुकांमध्ये हा वाद केंद्रस्थानी राहील, हे निश्चित आहे.