Ichalakaranji Mayor | इचलकरंजी महानगरपालिकेच्या महापौरपदासाठी भाजपमध्ये सुरू असलेली अंतर्गत गटबाजी आता टोकाला पोहोचली असून, आजी-माजी आमदारांमधील संघर्षामुळे पक्ष नेतृत्वाची डोकेदुखी वाढली आहे. एकहाती सत्ता मिळवूनही भाजपला अद्याप महापौरपदाचा उमेदवार ठरवता आलेला नाही. माजी आमदार सुरेश हाळवणकर आणि विद्यमान आमदार राहुल आवाडे यांच्यातच ही लढत केंद्रित झाली असून, दोन्ही गटांकडून आपापल्या समर्थक नगरसेवकांच्या नावांसाठी जोरदार लॉबिंग सुरू आहे.
इचलकरंजी महानगरपालिकेच्या ( Ichalakaranji Mayor ) निवडणुकीत भाजपने निर्विवाद वर्चस्व मिळवत स्पष्ट बहुमत प्राप्त केले. त्यामुळे महापौरपदावर भाजपचाच उमेदवार बसणार, हे निश्चित होते. मात्र सत्ता मिळाल्यानंतर लगेचच पक्षातील अंतर्गत मतभेद उफाळून आले. विशेषतः स्थानिक पातळीवर प्रभाव असलेल्या हाळवणकर गट आणि आवाडे गट यांच्यातील जुना संघर्ष पुन्हा एकदा उघडपणे समोर आला आहे. माजी आमदार सुरेश हाळवणकर हे इचलकरंजीच्या राजकारणातील अनुभवी आणि जुने नेतृत्व मानले जाते. नगरपालिकेवर आपला प्रभाव कायम ठेवण्याचा त्यांचा प्रयत्न आहे. दुसरीकडे, आमदार राहुल आवाडे हे तरुण नेतृत्व असून, आमदारकीसह संघटनात्मक ताकदीच्या जोरावर महापौरपदावर आपला शब्द चालावा, यासाठी आग्रही आहेत. त्यामुळे ही निवडणूक केवळ महापौरपदापुरती मर्यादित न राहता, भविष्यातील स्थानिक राजकारणाची दिशा ठरवणारी ठरत आहे.
महापौरपदासाठी दोन्ही गटांनी आपापल्या पसंतीची नावे पुढे रेटली आहेत. आवाडे गटाकडून नीतेश पोवार आणि उदय धातुंडे या नगरसेवकांची नावे जोरदार चर्चेत आहेत. हे दोघेही आवाडे गटाशी निष्ठावंत मानले जातात. तर दुसरीकडे, हाळवणकर गटाकडून तानाजी पोवार आणि प्रदीप धुत्रे यांची नावे पुढे आली आहेत. या नावांवरूनच पक्षांतर्गत तणाव स्पष्टपणे दिसून येतो. या साऱ्या पार्श्वभूमीवर भाजप नेतृत्वाने हस्तक्षेप करण्याचा निर्णय घेतला आहे. राज्याचे उच्च व तंत्र शिक्षण मंत्री चंद्रकांत पाटील यांच्या उपस्थितीत सांगली येथे इचलकरंजी संदर्भात महत्त्वाची बैठक आयोजित करण्यात आली आहे. या बैठकीस आमदार राहुल आवाडे, माजी मंत्री प्रकाश आवाडे आणि माजी आमदार सुरेश हाळवणकर यांची उपस्थिती असणार आहे.
या बैठकीत महापौरपदासाठी एका नावावर शिक्कामोर्तब करण्याचा प्रयत्न केला जाणार आहे. मात्र, जर या बैठकीतही एकमत झाले नाही, तर हा वाद थेट मुख्यमंत्री देवेंद्र फडणवीस यांच्या दरबारात जाणार असल्याची माहिती आहे. पक्षातील सूत्रांच्या माहितीनुसार, बैठकीत सहमती न झाल्यास दोन्ही गटांकडून प्रत्येकी एक किंवा एकत्रित तीन नावे मुख्यमंत्री देवेंद्र फडणवीस यांच्याकडे पाठवण्यात येणार आहेत. त्यानंतर अंतिम निर्णय ‘हायकमांड’कडून घेतला जाईल. त्यामुळे स्थानिक नेत्यांपेक्षा आता राज्य नेतृत्वाची भूमिका अधिक निर्णायक ठरणार आहे.
या अंतर्गत संघर्षाचा परिणाम थेट नगरसेवकांवरही होत आहे. अनेक नगरसेवक उघडपणे कोणत्या गटाच्या बाजूने जायचे, याबाबत संभ्रमात आहेत. काही नगरसेवक तटस्थ भूमिका घेत असून, अंतिम निर्णय वरिष्ठ पातळीवरून आल्यानंतरच भूमिका स्पष्ट करण्याच्या तयारीत आहेत. यामुळे भाजपमध्ये असलेले बहुमत असूनही सत्ता स्थापनेत विलंब होत आहे. इचलकरंजीतील हा संघर्ष केवळ महापौर निवडीपुरता मर्यादित राहणार नाही, तर आगामी जिल्हा परिषद, विधानसभा आणि संघटनात्मक निवडींवरही त्याचा प्रभाव पडण्याची शक्यता आहे. कोणाचा शब्द चालतो, हे या निवडीतून स्पष्ट होणार असल्याने दोन्ही गटांनी प्रतिष्ठेचा प्रश्न केला आहे.
एकीकडे राज्यात सत्तेत असलेला भाजप शिस्तबद्ध पक्ष म्हणून ओळखला जातो. मात्र इचलकरंजीतील ही परिस्थिती पक्ष नेतृत्वासाठी कसोटी ठरत आहे. स्थानिक नेत्यांमधील मतभेद कसे मिटवायचे आणि सर्वांना सोबत ठेवत निर्णय कसा घ्यायचा, हे आव्हान वरिष्ठ नेत्यांसमोर आहे.