Kolhapur Mayor 2026 | कोल्हापूर महानगरपालिकेच्या महापौरपदावर अखेर भारतीय जनता पक्षाने आपली पकड मजबूत करत बाजी मारली आहे. 2026 च्या महापौर निवडणुकीत भाजपकडून रुपाराणी निकम यांना महापौरपदाची संधी देण्यात आली असून, उपमहापौरपदासाठी जनसुराज्य पक्षाचे अक्षय जरग यांच्या नावावर शिक्कामोर्तब करण्यात आले आहे. उच्च व तंत्र शिक्षण मंत्री तथा भाजपचे ज्येष्ठ नेते चंद्रकांतदादा पाटील यांनी याबाबत अधिकृत घोषणा केली. या घोषणेनंतर महायुतीकडून आज (सोमवारी) दोन्ही पदांसाठी अधिकृत अर्ज दाखल केले जाणार आहेत.
कोल्हापूर महानगरपालिकेची विशेष सभा येत्या 6 फेब्रुवारी रोजी आयोजित करण्यात आली असून, जिल्हाधिकारी अमोल येडगे यांच्या अध्यक्षतेखाली या सभेत रुपाराणी निकम यांची अधिकृतपणे महापौर म्हणून निवड होणार आहे. रुपाराणी निकम ( Kolhapur Mayor 2026 ) यांना सव्वा वर्षांचा कार्यकाळ मिळणार असून, या कालावधीत कोल्हापूर महानगरपालिकेच्या कारभाराची धुरा त्यांच्या हाती राहणार आहे. महापौर व उपमहापौर पदासाठीचा निर्णय मंत्री चंद्रकांत पाटील, खासदार धनंजय महाडिक, आमदार अमल महाडिक, भाजपचे जिल्हाध्यक्ष विजय जाधव, प्रदेश सचिव महेश जाधव तसेच गटनेते मुरलीधर जाधव यांच्या उपस्थितीत झालेल्या बैठकीत घेण्यात आला. या बैठकीत महायुतीतील समन्वय राखत सर्वानुमते रुपाराणी निकम यांच्या नावावर शिक्कामोर्तब करण्यात आले.
कोल्हापूर महानगरपालिकेत सुरुवातीची सव्वा वर्षे भाजपचा महापौर राहणार हे स्पष्ट झाल्यानंतर भाजपमधील इच्छुकांमध्ये मोठी चुरस पाहायला मिळाली. महापौरपदासाठी ओबीसी प्रवर्गाचे आरक्षण पडल्याने प्रमोद देसाई, विजयसिंह देसाई, वैभव कुंभार यांची नावे चर्चेत होती. मात्र सर्वसाधारण गटातून निवडून आलेल्या रुपाराणी निकम यांचे नाव अखेर आघाडीवर आले. 19 जानेवारी रोजी आरक्षण निश्चित झाल्यानंतर तब्बल 14 दिवसांच्या चर्चेनंतर भाजपच्या शिष्टमंडळाने अंतिम निर्णय घेतला.
या निर्णयाची घोषणा करताना मंत्री चंद्रकांत पाटील यांनी विरोधकांवर सूचक टोला लगावला. “एकेकाळी भाजपला कोणी खुंटीवर टांगायलाही तयार नव्हते. मात्र आता दिवस बदलले आहेत. भाजप हा एक ब्रँड बनला आहे,” असे ते म्हणाले. तसेच कोल्हापूर महानगरपालिकेतील स्थायी समितीचे सभापतीपदही भाजपच घेणार असल्याचा दावा त्यांनी यावेळी केला.
रुपाराणी निकम या मागील महानगरपालिका निवडणुकीत राजेंद्रनगर परिसरातून निवडून आल्या होत्या. प्रभाग क्रमांक 18 मधून त्यांनी काँग्रेसचे दिग्गज उमेदवार भूपाल शेटे यांच्या विरोधात निवडणूक लढवली होती. भूपाल शेटे हे तब्बल 20 ते 25 वर्षे या प्रभागाचे नेतृत्व करत होते. मात्र निकम यांनी त्यांचा पराभव करत भाजपसाठी मोठा राजकीय विजय मिळवून दिला. याच कामगिरीची दखल घेत पक्षाने त्यांना महापौरपदाची संधी दिल्याचे बोलले जात आहे.
कोल्हापूर महापौरपदाची निवडणूक भाजपसाठी प्रतिष्ठेची ठरली असून, या निवडीनंतर शहराच्या राजकारणात भाजपची ताकद वाढल्याचे चित्र आहे. आगामी सव्वा वर्षांच्या कालावधीत रुपाराणी निकम यांच्या नेतृत्वाखाली कोल्हापूर शहराचा विकास, प्रशासन आणि राजकीय समीकरणे कशी आकार घेतात, याकडे संपूर्ण महाराष्ट्राचे लक्ष लागले आहे.