Medha Kulkarni Slams BJP but Congress Cheers | पुणे – गेल्या अनेक वर्षांपासून भाजपच्या ताब्यात असलेल्या पुणे महापालिकेतील विकासकामांवर आता त्यांच्याच पक्षाच्या खासदाराने थेट नाराजी व्यक्त करत घरचा आहेर दिला आहे. पुण्याच्या भाजप खासदार मेधा कुलकर्णी यांनी नुकत्याच दिलेल्या एका वक्तव्यात पुण्याचा विकास गेल्या दहा वर्षांत पूर्णतः ठप्प झाल्याचे स्पष्ट करत भाजपच्या शहरातील कारभारावर प्रश्नचिन्ह उपस्थित केले आहे. विशेष म्हणजे, त्यांच्या या स्पष्टवक्तेपणामुळे विरोधकांनी मात्र जल्लोष करत आनंद व्यक्त केला आहे.
खासदार मेधा कुलकर्णी यांनी सांगितले की, “गेल्या दहा वर्षांत पुण्याचा विकास शून्य झाला आहे. आता पुण्यात राहावं असं वाटत नाही.” त्यांच्या या विधानामुळे राजकीय वर्तुळात मोठी खळबळ उडाली आहे. पुणे हे महाराष्ट्राचं ‘ऑक्सफर्ड’ मानलं जातं, आयटी हब आहे, शिक्षणाचं माहेरघर म्हणून ओळखलं जातं. अशा शहरात जर स्थानिक खासदारच राहायला नकोसं वाटतंय म्हणत असेल, तर ही बाब अत्यंत गंभीर ठरते.
कुलकर्णी यांच्या या टीकेवर प्रतिक्रिया देताना काँग्रेसचे ज्येष्ठ नेते व माजी आमदार मोहन जोशी म्हणाले, “आता आमच्याकडून टीका करण्याची गरजच उरली नाही. भाजपच्या अपयशाची कबुली खुद्द त्यांच्या खासदारांनीच दिली आहे.” जोशी यांनी हे देखील नमूद केले की, नागरिकांच्या त्रासाला कारणीभूत असलेल्या अपयशी कारभारावर भाजपकडून अजूनही गांभीर्याने विचार होत नाही.
पंतप्रधान नरेंद्र मोदी यांनी २०१५ मध्ये सुरू केलेली ‘स्मार्ट सिटी’ योजना हा भाजपच्या शहरी विकास दृष्टिकोनाचा कणा मानला जातो. मात्र पुण्यात ही योजना अत्यंत ढिसाळपणे अंमलात आणली गेली असल्याचा आरोप आता प्रत्यक्ष भाजपच्या नेत्या मेधा कुलकर्णी यांनी अप्रत्यक्षपणे केला आहे. शहरात अनेक ठिकाणी कामं अर्धवट सोडण्यात आली आहेत. मुठा नदी पुनरुज्जीवन प्रकल्पासारखी महत्वाकांक्षी योजना अद्याप कागदावरच असल्याचे चित्र आहे.
पुण्यातील रस्त्यांची अवस्था अत्यंत दयनीय आहे. पावसाळा सुरू होण्याआधीच शहरातील अनेक रस्त्यांवर मोठाले खड्डे पडले आहेत. सार्वजनिक स्वच्छतेकडे दुर्लक्ष झाले असून कचऱ्याचा प्रश्नही दिवसेंदिवस गंभीर होत चालला आहे. रस्त्यांवरील खड्ड्यांमुळे अपघातांची संख्या वाढत असून तरुणांचा जीव जाण्याच्या अनेक घटना अलीकडच्या काळात समोर आल्या आहेत. मात्र भाजपच्या स्थानिक नेत्यांमध्ये या विषयांवर काहीही ठोस कृती दिसून आलेली नाही, अशी टीका मेधा कुलकर्णी यांनी अप्रत्यक्षरित्या केली आहे.
खासदार मेधा कुलकर्णी यांची टीका ही केवळ पक्षातील अंतर्गत नाराजीचा आवाज नाही, तर ती पुणेकर नागरिकांच्या मनातील खदखद व्यक्त करणारी ठरत आहे. भाजपला गेल्या काही वर्षांत पुणे महापालिकेवर पूर्ण वर्चस्व मिळाले असताना, त्या सत्तेचा पुरेपूर उपयोग नागरिकांच्या भल्यासाठी झाला का, हा प्रश्न उभा राहतो.
खासदार कुलकर्णी यांच्या या वक्तव्यानंतर पुण्यातील भाजपचा अंतर्गत गोंधळ अधिक स्पष्टपणे दिसून येत आहे. एकीकडे विरोधक याचा प्रचारात फायदा घेत असताना, दुसरीकडे भाजप नेतृत्वासाठी हे आत्मपरीक्षणाचं कारण ठरू शकतं. आगामी महापालिका निवडणुकीच्या पार्श्वभूमीवर ही टीका अधिकच चर्चेचा विषय ठरण्याची शक्यता आहे.